Wala mang binabanggit na mga pangalan o anupaman, ang long-time actor na si Romnick Sarmenta ay tila may pinapatutsadahan sa kanyang tweet kamakailan kaugnay sa isang sining na inilarawan niya sa kabuuan bilang pagsasayang ng oras at pagbali sa kaotohanan habang pinagkakaperahan.
Pagbabahagi niya sa Twitter, magkokomento sana siya tungkol dito ngunit nanghinayang siya sa oras, letra at mga salitang gagamitin niya.
“Magko-comment sana ako, pero sayang ang oras, titik at pananalita sa mga taong ginagawang excuse ang art, at binabago ang katotohanan sa pamamagitan ng sining,” panimula niya.
“Kasing sayang ng oras na binuo ninyo yung pinagkaperahan ninyo,” dagdag pa niya. “E di magalit kayo. Nagsasabi lang ako ng totoo.”
Ang sikat na historyador na si Xiao Chua ay napakomento sa tweet na ito ni Sarmenta.
Aniya, “Sobra-sobra nang taas ng respeto ko kay Romnick Sarmenta. Naku ngayon abot na hanggang bubong!”
Hindi man nagbanggit kung sino o ano ang pinatutungkulan dito, tila awtomatiko nang ikinabit ng mga social media users ang tweet na ito sa kasalukyang ipinalalabas na “Maid in Malacañang” ni Darryl Yap na ayon dito ay hindi isang biopic kundi ‘a story of a family.’
May mga sumunod pang tweet ang dating child actor na mahihinuha mong kakabit ng kanyang naunang sentimyento ngunit idinaan niya sa pamamagitan ng mga larawan ng kanyang sulat-kamay na mga mensahe na ang iba ay ginawa niyang patula.
May pahiwatig siya sa kanyang mga saloobin tungkol sa pagbaluktot sa kasaysayan, mga kasinungalingan at nagpapaalala ng paggising bago makalimot sa kasaysayan.
“Gumising ka bago malimot ang kasaysayan, tumindig kahit mag-isa, sa gitna ng mga kasinungalingan. Maaaring sa iyong paningin ay wala namang nagbago, di ka naman apektado; peo ang tutoo, binali nito ang iyong pagkatao.”
“Kasaysayang pilit mang baluktutin, sa mga palabas, at salita’y sadyang baguhin. Gumising ka, bago ka bangungutin!”
Basahin: Romnick Sarmenta, gumawa ng tula kaugnay sa pagpili ng lider ng bansa sa darating na Halalan 2022
Si Sarmenta ay isa lamang sa mga celebrity na nagpahayag ng pagsuporta sa tandem nina dating VP Robredo at Sen. Pangilinan noong nakalipas na halalan.
Inilahad ng aktor ang kanyang damdamin sa pamamagitan ng tula na kanyang in-upload sa IG post noong Marso 19.
“Huwag na tayong magsugal at makipagsapalaran, mahirap yung para tayong niloloko. Hindi lang para sa isang araw ito. Ilang taon din tayong papasailalim ng kung sino mang mananalo.
Sa araw ng halalan, sa gitna ng gulo, sa harap ng tukso… Bago ka magpadala sa ayuda at pangako, alalahanin mo… ang mga anak mong wala pang boto, ang mga taong hindi makaboto, at lahat tayong mga Pilipino.”
