Napag-usapan sa confirmation hearing ni Department of Science and Technology (DOST) Secretary Renato Umali Solidum Jr. ang posibilidad na makagawa ng ‘food pill’ na tatagal ng mahabang panahon para sa mahihirap nating kababayan.
Nabanggit kasi ni Sagip Partylist Representative Rodante Marcoleta sa nasabing pagdinig ang ideya matapos pumasok umano sa isip niya na ang mga astronaut ay nabubuhay nang matagal sa kalawakan kahit hindi naman sila nagluluto ng pagkain doon.
“I’m thinking aloud na kung sakali pong makaimbento tayo nung kinakain nila, ibibigay ko po sa mga mahihirap na kababayan natin. Even for months hindi sila kakain, hindi sila mamatay,” saad ng mambabatass.
“Meron pa ba tayong ganun? Makakagawa pa ba tayo ng ganun?” tanong pa ni Marcoleta.
Sagot naman ni Solidum ay walang ganung pagkain at ang meron lamang sa kasalukuyan ay ang mga ready to eat food packs na ipinamamahagi tuwing may kalamidad at tumatagal ng hanggang anim na buwan ang shelf life.
Patuloy ni Marcoleta, sana daw ay makaimbento ng ganung pildoras na isang beses lamang kakainin subalit tatagal nang ilang linggo o buwan bago magutom ang isang tao.
“Kasi po yung astronauts, ‘pag kinain niya ‘yun, it will last for several days, if not months. Kasi yung mahirap na mahirap talaga, wala po silang makakain,” wika pa ng kongresista.
Paliwanag pa niya, ang ganitong pagkain ay ‘palliative’ lamang na ang ibig sabihin ay upang mapunan ang ‘gap’ subalit makatutulong umano ito nang malaki sa mahihirap na Pinoy.
“Pag ininom po ng mahirap, in two weeks lang, Mr. Secretary, na hindi siya bumili ng pagkain, hindi siya nagluto, ang laking bagay na po ‘yun. Makagagawa kaya tayo ng ganun?” ayon pa kay Marcoleta.
Tugon naman ni Solidum, pag-iisipan nila ang ganitong ideya habang tinitiyak na ang seguridad sa pagkain ng ating mga kababayan ang isa sa kanilang pangunahing tinitingnan.