Itinuring ni Herlene Budol na ‘bangungot’ ang kaniyang naging karanasan sa Uganda kung saan lalahok dapat siya bilang kinatawan ng Pilipinas sa naunsyaming Miss Planet International 2022.
Sa kaniyang salaysay sa ‘Updated with Nelson Canlas’ podcast, mistulang ‘delubyo’ umano ang mga araw na iyon na hindi niya inakalang mararanasan dahil ang saya-saya pa niya nang dumating doon at kung saan-saang mall pa sila naglaboy.
Subalit ‘stress’, sakit ng ulo at takot umano ang idinulot sa kaniya ng mga sumunod na pangyayari dahil walang preparasyon ang organizer kaya nagdusa talaga sila nang husto dahil wala man lang silang pagkain o inumin sa rehearsal sa rooftop na tirik na tirik ang araw.
Dahil nga sila na ang nagbabayad sa kanilang pagkain, napilitan umano siyang manghingi ng pera sa isang OFW na nakita niya sa mall.
“‘Di ba dinala kami sa mall, sabi sa akin, ‘uy, Hipon pa-picture.’ Buti nakilala po ako nun. Nung nakilala ako, talagang kinapalan ko ang mukha ko. Para nga akong pulubi, sabi ko,” kuwento ni Herlene.
Nilapitan niya raw ang Pinoy at nagmakaawa: “Te, libre mo naman ako… pengeng kahit ano, barya. Pambili lang ng kayang bumili ng kahit tinapay. Pero nilibre niya po kami sa parang fast food chain,” dagdag pa ng dalaga.
Bukod dito, naranasan niya rin umano na mahabol ng pulis dahil nag-iimbestiga na nga ito matapos hindi mabayaran ang hotel na kanilang tinutuluyan at ang van na ginagamit ng mga kandidata.
Dahil ayaw silang palabasin ng hotel, nakiusap umano siya sa staff na mayroon naman siyang tinutuluyang apartment kaya pumayag ang mga ito.
Subalit pagkalabas raw ay may humabol pa sa kaniyang mga armadong pulis.
“Paglabas ko, siguro ‘yung ibang pulis, hindi nasabihan. Hinabol ako ng maraming may baril. Dalawa po ‘yung humabol sa ‘kin na may mahabang baril,” kuwento ng komedyante.
“Sabi ‘hold on, hold on.’ Sabi ko sa sarili ko, ‘Parang ito na ata katapusan ko.’ Akala ko sa pelikula ko lang mapapanood ‘to. May mga aso pa, sobrang ang lalaking aso. Nanlalamig ako, nag-flashback sa ‘kin ang lahat,” dagdag pa nito.
Mabuti na lamang daw at pinayagan sila ng manager ng hotel na makalabas pero habang nasa sasakyan ay hinimatay na daw siya, ayon pa sa beauty queen.
Matapos ang karanasang ito ay limang araw daw siyang hindi lumabas hanggang sa sunduin na siya ng kaniyang mga magulang.
I-Click ang imahe sa ibaba upang mapakinggan ang podcast:
