Nakilala si AJ Raval sa pagganap sa mga pelikula na kinakailangan niyang magbilad ng kanyang katawan, pero kung papipiliin, sinabi niya na mas pipiliin niyang gumawa ng mga maaaksyong pelikula.
Si AJ ay isa sa labing walong anak ni Jeric Raval sa iba’t ibang nakarelasyon. Isang mahusay na action star si Jeric kaya naman hindi nakapagtataka kung idolohin siya ng anak sa paggawa ng action movies.
Image from AJ Raval
Binigyang katuparan ng Viva Films ang pinapangarap ni AJ na gumanap ng role na kinakailangan ng umaatikabong aksyon sa bago niyang pelikula na “Hugas” kung saan muli niyang makatatambal si Sean de Guzman.
Ibang-iba raw ang “Hugas” kaysa sa mga nauna nilang ginawang pelikula ni Sean.
“Unang-una siyempre action ito at may mga training kami rito para maging astig ‘yung mga kilos namin. Siguro ‘yung bond namin ni Sean, meron kaming natural chemistry. ’Yung bond namin naging mas deep kasi nagka-work na kami nang ilang beses. Also, lumalabas din kami minsan kahit walang work. Siguro sa mga love scenes namin makikita n’yo du’n yung love,” paliwanag ng dalaga.
Sana raw ay mas marami pa siyang action movies na magawa. Idol raw niya ang ama at gusto niyang sundan ang mga yapak nito sa pagiging isang action star.
“Siyempre idol ko tatay ko at sa kanya ako open, kung bakit nag-artista ako, at paano nag-start dahil sa dad ko. Siyempre gusto ko sumunod sa yapak niya. Gusto ko mag-action din. Gusto ko ‘yung mga fight scene na MMA, may Muay Thai, parang ganu’n. Mas nahihirapan ako mag-strip kesa sa action stunts. Kasi ang action sa akin parang normal na lang din na ginagawa ko,” sabi ni AJ.
Image from AJ Raval
Tinuruan daw siya ng ama sa mga fight scenes tulad ng pagsipa nang mataas at kung paano gawing maangas ang ekspresyon ng maamo niyang mukha.
“Tapos sa fight scenes tinuruan niya ako sumipa nang mataas at sumuntok nang diretso. Tinuruan niya ako sa mga ganu’ng bagay. At saka kasi maamo ‘yung mukha ko, mukha akong bata so itinuturo niya sa akin kung paano maging maangas ‘yung facial expression,” kuwento pa niya.
Dahil sa sunud-sunod na mga pelikula ay naipagpagawa na raw ni AJ ng bahay ang nanay at mga kapatid niya. Naghati raw sila sa gastos ng amang si Jeric. Nakabili na rin daw siya ng bagong sasakyan at pinag-iipunan na ang pampagawa ng sariling bahay.
Image from AJ Raval