Nahulicam ang isang grupo ng mga volunteer bumbero na rumesponde sa nasusunog na Starmall sa Alabang na naghakot ng mga food items mula sa natutupok na shopping mall.
Sa isang TikTok video na ibinahagi ng isang netizen, makikitang nasa loob ng firetruck ang kahon-kahong Stick-O wafer sticks, Piattos chips, Coca-cola canned softdrinks at iba pa.
Screenshot from a TikTok video
“Starmall Alabang fire scene. Hayst kaya nasisira ibang brigada na volunteer dahil sa ganitong mga brigada,” ang caption sa TikTok video.
Maririnig sa video ang isang boses ng lalaki na pinaniniwalaang security personnel ng shopping mall na ipinabababa sa truck ang mga naturang food items. Maririnig din ang tinig ng isang babae na itinatanggi na sa kanila ang mga iyon.
“Pakibaba n’yong lahat ‘yan. Nasusunugan na nga ganyan pa iisipin n’yo, aba,” maririnig na sabi ng lalaki.
“Sir, hindi kami nag-ano n’yan, sir,” maririnig naman na pagtanggi ng babae.
“Hindi ho. Hindi ho. Truck n’yo ‘yan,” sabi pa ng tinig ng lalaki.
Binasa pa ng lalaking kumukuha ng video ang markings sa firetruck na nagsasabi kung saan galing ang volunteer fire brigade.
“Barangay Zapote. Kapitan Cesar T. Rubio and Council,” aniya.
Screenshot from a TikTok video
Narito naman ang reaksyon ng mga netizens sa looting incident:
“Ang dami hahahaha ‘kala ko dalawang kahon lang.”
“Volunteer na salisi.”
“Tsk. Pinapahiya n’yo kaming Las Piñeros.”
“Tsk. Nakakasira sa mga kapwa natin firefighter. ‘Wag ganyan.”
“Hindi pala bumbero, reseller pala.”
“Totoo pala na ‘yung ibang bumbero may ninanakaw sa loob ng bahay?”
Screenshot from a TikTok video
“’Yan ang dahilan kaya ang SM ayaw papasukin ang bumbero kapag may sunog kahit sa residential. Nasisira ang mga bumbero na matino nadadamay sa katulad n’yo. Nakakahiya kayo.”
“Hindi naman lahat, pero meron talaga na gumagawa ng ganyan.”
May iba naman na pinangatwiranan pa ang ginawang looting. Mas mabuti na raw na kinuha ang mga iyon kaysa matupok at masayang lang.
“OK lang ‘yan nang mapakinabangan kaysa masunog.”
“Pero kung iisipin sayang kaysa naman sa masunog, mapakinabangan kahit papaano.”