Isa umano sa posibleng dahilan kung bakit nabaon sa utang ang misis ni San Miguel Beer guard Terrence Romeo ay ang pagkalulong umano sa ‘bisyo’ ng basketball player, ayon kay Lolit Solis.
Sa kaniyang Instagram post nitong Biyernes, Enero 14, sinabi ni Manay Lolit na naaawa siya kay Pia Romeo (Beatrice Pia White) dahil bata pa ito subalit baon na sa utang at ngayon ay nahaharap sa iba’t-ibang kaso.
“Isang napakahirap na problema sa lahat Salve iyong PERA. Kaya na imagine ko kung gaano kabigat siguro ang ulo ni Pia Romeo, asawa ni Terrence habang araw araw siyang hinahabol ng mga taong inutangan niya ng pera,” panimula ng beteranang entertainment columnist.
“Ewan ko kung tutoo na dahil sa naging ‘bisyo’ daw sa sugal ng asawang si Terrence kaya nabaon sa utang si Pia,’ dagdag pa nito.
Imposible naman daw na hindi alam ni Terrence na may problema sa pera ang kaniyang misis.
Mas higit na nakaaawa umano ngayon ay ang anak ng mag-asawa na napakabata subalit nahaharap na sa malaking problema at kahihiyan ang kaniyang ina.
“Isang bagay kasi na dapat lagi mo nasa isip, huwag dapat lalagpas sa kinikita mo ang ginagasta mo. Huwag mo pasukin ang bisyo na magiging problema mo later on. At kung hindi kaya, huwag pilitin,” ayon pa kay Manay Lolit.
“Iyan pera kasi, pag hinahabol mo mas lalong lumalayo sa iyo, lalo kang tutuksuhin,” wika pa nito.
Parang wala na raw pagmamahal pa ang player sa misis nito dahil hinayaang harapin ang napakalaking problema nang mag-isa. Dapat umano sa mga ganitong pagkakataon ay magkasama silang lutasin ang malubhang suliranin na kanilang hinaharap.
Nauna nang napabalita na nagkahiwalay na sina Terrence at Pia bago pa man pumutok ang balitang naaresto ng mga awtoridad ang babae dahil sa iba’t-ibang kaso gaya ng carnapping at estafa.
BASAHIN: Terrence Romeo, iniwan nga ba sa ere ang asawang nasakote ng awtoridad?
Ibinulgar din kamakailan ni Ogie Diaz na isa siya sa mga pinagkakautangan ni Pia na umabot na umano sa mahigit P5-M ang nakuha sa kaniya at maaaring hindi na niya ito mabawi.
BASAHIN: Utang ng ex-wife ni Terrence Romeo kay Ogie Diaz mahigit P5 million