Naging inspirasyon ng dating OFW sa Saudi Arabia ang larawan ng batang magkapatid na hindi niya kilala habang nakalusong sa baha noong 1997 sa Pilipinas.
Sa episode ng “Kapuso Mo, Jessica Soho,” noong Mayo 2 ay ibinahagi ng dating OFW na si Roel Mendoza na regular siyang nagbabasa ng diyaryo na galing sa Pilipinas kahit nasa KSA siya.
Noong 1997, nakita niya ang larawan ng batang magkapatid na nakalusong sa baha. Pasan sa likod ng isang bata ang mas nakababata niyang kapatid.
Kapag tinititigan umano ni Roel ang larawan ng dalawang bata ay may kirot sa puso niya dahil isa rin pala siyang kuya sa kaniyang bunsong kapatid.
Naging inspirasyon din kay Roel ang larawan ng magkapatid sa tuwing dumadaan siya sa mga pagsubok ng buhay.
Sa mga sandali na nahihirapan siya, iniisip niya ang batang magkapatid sa larawan na kung kinaya nila ang pagsubok sa buhay ay kakayanin rin niya.
Ang naturang larawan ay idinikit noon ni Roel sa kaniyang bulletin board sa KSA, katabi ng kaniyang family photo.
Pagkatapos ng 17 taon na pagtatrabaho sa KSA, umuwi ng Pilipinas si Roel dala ang larawan ng magkapatid na ginupit niya sa pahayagan.
Sa kasamang-palad nabiktima umano si Roel ng pyramiding scam kaya nagsimula siyang muli sa wala.
Sa mga sandaling iyon, naging inspirasyon niyang muli sa pagbangon ang larawan ng batang magkapatid.
Matapos ang 25 taon, hindi niya pa rin makalimutan ang mga bata at ninais niyang mahanap ang dalawa upang kumustahin ang kanilang naging buhay.
Ipinost niya ang larawan sa social media para magpatulong sa paghahanap sa mga bata. Kasabay naman nito ang pag-tag ng ilang netizens sa “KMJS” para tumulong sa paghahanap.
Tumulong naman ang KMJS team upang matunton ang mga bata sa naturang larawan na unang nailathala sa pahayagang Philippine Daily Inquirer.
Napag-alaman ng team na ang larawan ay kuha pala sa Dinalupihan, Bataan. Nakilala ang magkapatid na sina Ronelo Carlos, ang bunsong nakapasan sa kaniyang kuya na si Rowell.
Hindi raw nila nalaman na nag-viral ang larawan nila noong bata pa sila at may taong naghahanap sa kanila.
Ngayon na natukoy na ang kinaroroonan ng magkapatid ay agad namang bumiyahe si Roel patungong Bataan upang makita at makausap sa unang pagkakataon ang magkapatid na naging bahagi ng kaniyang buhay.
Umantig ang kuwento ng maraming netizens kaya’t hindi nakapagtataka na humakot ito ng milyong views,
Panoorin ang feature video na ibinahagi ng KMJS:
