Viral ngayon sa social media ang bride at groom na sinusuong ang rumaragasang baha sa Brgy. Igcococ, Sibalom, Antique para maidaos ang reception ng kanilang kasal.
Upang makarating sa kabila ay kinailangan nila ng back hoe na nagsilbi namang bridal car para makarating sa patutunguhan ang mag-asawa na nakilala na sina Ivy at Redjie.
Sa video na ibinahagi ni Janet Sareno sa kanyang Facebook account, makikita ang malakas at tumataas na tubig sa ilog sa naturang lugar.
“Walang baha..walang ulan.ang makapipigil sa tunay na nagmamahal… congratz ivy & redjie,” saad sa caption ni Janet.
Ayon kay Janet na siyang kumukuha ng video, tapos na ang kasal at patungo na sila sa reception sa bahay ng bagong kasal bandang tanghali nang biglang rumagasa ang tubig sa ilog dulot ng malakas at walang hintong pag-ulan.
Matagumpay naman na nakatawid ang newlyweds pati na rin ang kanilang mga bisita.
‘Ika nga, isang pagsubok ang nalampasan nilang mag-asawa, kaya naman sa hamon ng buhay ng mag-asawa kung sabay n’yo itong haharapin at kasama ang Diyos ay malalampasan din ang agos ng problema.
Ang video, na ipinost ni Janet, ay nakakuha na ng higit sa 431k views na may 4.4k reacts, 569 comments at halos 6K shares..
Marami ang bumati sa bride at groom at may mga naawa rin sa sinapit nila at may mga humanga.
“Unsafe s’ya pero sa ngalan ng pag-ibig ..big salute”
“Kawawa naman samantalang sa ncr, maayos na daan binabakbak para may project.”
“So risky pero sa ngalan nang pag-ibig, kayang isugal ang safety. Congratulations and best wishes”
“Grabe Sana all isang inspirasyon sa mga mag-asawa ‘yan go go go congrats po best wishes”
“This is the proof that true love exist no matter how hard life can be as long as you are together specially in the most difficult time.”