Sinabi ni Senador Alan Peter Cayetano noong Biyernes na agad siyang maghahain ng panukala para sa isang beses na cash aid na nagkakahalaga ng P10,000 sa bawat pamilyang Pilipino.
Ginawa ni Cayetano ang pahayag sa oath-taking ceremony ng mga bagong halal na opisyal ng Taguig City noong Huwebes.
Gayunman, idiniin din niya na ang ’10K Ayuda’ Bill ay gagawa ng aksyon mula sa Senado, Kapulungan ng mga Kinatawan, at Malacañang.
“Sa mga nagbabash sa 10k ayuda, kung kaya ko lang silang bigyan ng tag-sampung libo, binigay ko na sa kanila. Pero sa katotohanan ito’y isang legislative proposal,” ani Cayetano sa ulat ng GMA news.
“So ang hinihingi ko po doon sa mga tumutuligsa sa programang Sampung Libong (Pag-asa) during the pandemic, tumulong na lang kayo,” dagdag pa niya.
Hinimok ni Cayetano sina Taguig-Pateros Rep. Ricardo ‘Ading’ Cruz Jr. at Taguig 2nd District Rep. Maria Amparo “Pammy” Zamora na i-file na nila sa Kongreso ang dalawa sa kanyang ‘pet bills.’
“Today may I take the opportunity to ask that two of my pet bills, ‘yung moral uprightness at y’ung sampung libong ayuda, ay i-file din ng ating partner sa Kongreso ni Congresswoman Pammy at Congressman Ading para sabay po lumarga ang ating mga pet bills,” wika ng senador.
Naghain si Cayetano ng House version ng panukalang batas bilang kinatawan ng Taguig noong Pebrero 2021 ngunit hindi ito kasama sa Bayanihan 3 package.
Itinatag din niya ang programang “Sampung Libong Pag-asa” noong Mayo 2021 ngunit ito ay ipinagpaliban noong Pebrero 7, 2022, alinsunod sa mga panuntunan sa kampanya ng Commission on Elections.
“Una sa lahat, pansamantalang naka-pause ang ating mga programa bilang pagsunod sa rules ng Comelec noong panahon ng kampanya,” ayon sa isa niyang pahayag.
Dahil dito, sa social media ay laging ikinokomento ng mga netizen ang katagang, “hindi namin malilimutan ang pangako ni Allan Cayetano ang 10k ayuda para sa bawat pamilyang Pilipino.”
Basahin: ‘Ipinangakong P10k na ayuda’ ni Alan Peter Cayetano, hiniritan ng netizen sa isang mall