Sa gitna ng mga nakapanlulumong balita at iba’t ibang mga negatibong post sa social media, nagdala ng aliw at katatawanan ang isang birthday cake na sa halip na dedication ay sermon ang nakasulat.
Sa Facebook post ni Cecille Galon Purog, makikita ang birthday cake na ibinigay niya para sa kaarawan ng kanyang kapatid na si Cybelle. Sa halip na ang normal na “HAPPY BIRTHDAY” o isang nakaaantig na dedication, sermon ang mababasa rito dahil sumabay pa raw si Cybelle sa mga gastusin at sa hindi pa dumarating na suweldo.
“Nagpabili ka pa talaga ng cake, CYBELLE, kita mo ngang wala pa kaming suweldo at enrollment pa ng mga pamangkin mo,” mababasa sa dedication cake na ibinigay niya sa kapatid.
Pero wala naman daw personalan dito. Sa halip na mainis, tawang-tawa pa raw si Cybelle dahil ganito raw talaga ang bonding nilang magpapamilya; kulitan at asaran ang bonding kaya naman bawal daw ang pikon sa kanila.
Bukod pa rito, ito ay isa lamang sa mga masasayang sandali na pinagsasaluhan nila dahil kahit nasa isang village lang sila nakatira, bihira na raw silang magkita-kita ngayon dahil abala na sa kanya-kanyang trabaho at buhay nila.
“Tawa lang siya nang tawa. Gano’n lang kasi kami ‘pag nag ipon-ipon, magulo kami na masaya. Kahit kasi sa isang village lang kami nakatira magkakaiba kasi kami ng block at bibihira kaming magkita-kita kasi nga busy na kami sa mga kanya-kanya naming trabaho,” pagbabahagi ni Cecille.
“‘Pag nagkikita-kita kami walang seryosong usapan lagi kung ‘di bardagulan at tawanan. Wala kasing pikon sa aming magkakapatid. Bawal ang pikon sa pamilya namin. Hahahahaha!” saad pa ng nag-post.
Patuloy pa rin nagva-viral at nagpapasaya sa iba’t ibang social media platforms ang cake ni Cybelle. Bukod sa mga nire-repost ng ibang netizen, na-feature na rin sa balita ang sermon-flavored cake para sa may kaarawan.