Isang OFW sa Kuwait ang nagpapasalamat sa kanyang mabubuting amo sa palaging pagsuporta sa kanya at sa kanyang pamilya sa nakalipas na pitong taon na kasama niya ang mga ito.
Ibinahagi ni Analyn Barrameda Basila sa Kami ang mga paghihirap niya na malayo sa kanyang pamilya – at iyon ay isang bagay na madaling makaka-relate ang karamihan ng mga OFW.
Pitong taon na umanong naninilbihan si Analyn sa Kuwait. Bagama’t hindi siya nakauwi sa nakalipas na apat na taon dahil sa pandemya, suwerte pa rin siya na mayroon siyang magandang trabaho kasama ang mabubuting amo sa Middle East na itinuturing siyang pamilya.
“Ang pagiging ofw ay napakahirap sa katulad naming may mga anak na iniwan sa pinas. Subalit ang hirap na ‘yun ay napapalitan ng saya kapag nakikita kong nasa maayos sila at naibibigay ko ang mga pangangailangan nila,” aniya.
Nagpapasalamat din siya na binibilhan sila ng kanyang amo ng pagkaing Pinoy at binibigyan umano ng day off at nababayaran sa tamang oras.
Binibilhan pa nga ng ‘pasabulong’ ang kanyang mga anak at nanay tuwing uuwi umano siya sa Pilipinas.
“Sobrang mababait! Napaka suwerte ko po dahil sila ang naging amo ko for almost 7 years dahil parang kapamilya ang turing samin. Like sa food, binibilhan kami ng pagkaing pinoy, may day off kami, on time magpa sahod, laging kinakamusta ang mga anak at magulang ko, kapag nagbabakasyon pati mga anak at nanay ko may pasalubong sila, nagbibigay ng kung ano-ano para sa pamilya ko sa pinas, at higit sa lahat open po kaming makipag usap sa pamilya namin. Pa swertehan sa amo talaga. Ang sarap bumalik balik kapag nakatagpo ka ng mabubuting amo,” dagdag pa niya.
Salamat sa kanyang mga amo at sa kanyang trabaho sa Kuwait dahil nakapagpatayo na si Analyn ng bahay para sa kanyang pamilya at nasusuportahan din niya ang mga pangangailangan ng kanyang mga anak na nasa grade 11 at 3.
Marami rin daw natulungan si Analyn na mga kapwa OFW na ibinalik sa agency na napunta ngayon sa mga pamilya ng sarili niyang amo
Napuri naman si Analyn ng netizens dahil hindi niya hinayaang masayang ang kanyang pagsasakripisyo para sa kanyang pamilya. Tugon niya rito, dahil unang una iniisip niya umano kung ano yung dahilan kung bakit siya lumayo sa pamilya, at pangalawa nakakahiya kung magloloko siya dahil mayroon na siyang binatang anak. Para sa kanila ang kanyang pagsisikap.