Nag-viral noong isang araw ang Tiktok video ng isang teacher kung saan ipinakita niya ang isang estudyante na bote ng toyo ang ginagamit na tumbler o baunan ng tubig.
Ayon sa post ni Teacher Malone Belmonte ng Panitian Elementary School sa Quezon, Palawan lumapit sa kaniya ang kaniyang mag-aaral at nagpatulong para buksan ang boteng dala.
“Nagulat and at the same time nalungkot ako. My learner asked me to open her water bottle. At first sight akala ko may baon siya na toyo, yun pala yun na ang water bottle niya,” caption ni Teacher Malone.
May mensahe rin si Teacher para sa mga batang hindi katulad ng kaniyang estudyante na nagpupursiging mag-aral kahit pa kapos sa buhay.
Aniya, “Don’t be so demanding in life when in fact there are these kids who are willing to go through the hardships in life for their dreams. We are lucky enough na hindi natin naranasan ang ganitong shortage sa buhay.”
Umani naman ng simpatiya at habag ang bata sa naturang Tiktok video. Dahil dito marami rin ang nag-alok na tulungan ang nasabing estudyante.
Ayon kay Teacher Malone, maraming netizens na umano ang nag-message sa kaniya para magpadala ng tulong sa kaniyang learner.
I didn’t expect po na maraming willing na tumulong sa aking learner.
“At first ang purpose ko lang po ay i-encourage ang aking fellow teachers na ma-motivate sila sa pagtuturo kahit hirap na hirap na sila,” bahagi ni Teacher.
“I just want to share at help kayo na ma-relize na i-appreciate natin yung mga bagay na meron tayo,” dagdag pa ng guro.
Nagpasalamat din si Teacher sa mga netizens na nais tumulong kabilang na ang ilang nag-alok na palitan ang tumbler ng bata.
Subalit hiling naman sana niya ay hindi lang ang naturang bata ang tulungan at kung maaari ay ang buong klase.
Hindi lang pala ang learner sa video ang gumagamit ng ‘improvised tumbler’ kung hindi ang iba pa niyang estudyante na gumagamit naman ng bote ng softdrinks at sukang puti, base sa bagong video na kaniyang ibinahagi.
“I’m so thankful na may iba po na nag-donate na isinama po yung ibang kasama niya,” pasasalamat ni Teacher Malone.
Samantala, isinama nila ang bata pauwi para maihatid na rin ang mga tulong na natanggap para sa bata. Bless you all, good samaritans!
