Dalawang taon simula nang mawala ang kanyang amang si Decoroso Seguerra, isang nakaaantig na mensahe ang ibinahagi ng Filipino singer-actor na si Ice Seguerra sa social media.
Sa Instagram, nag-post si Ice ng litrato ng kanyang ama at binalikan ang mga paborito nitong gawin. Aniya, labis pa rin siyang nangungulila sa pagkawala nito.
“Dalawang taon mula nung nauna ka na para makipag mahjong at bidyoke sa langit. Miss pa rin kita kaya nalulungkot pa rin ako kapag naiisip kita. Pero alam kong happy ka diyan atsaka alam ko rin na kahit hindi na kita nakakausap, parati kang nasa puso ko,” aniya.
“I love you, Pogi. Missing you always,” pagpapatuloy pa ni Ice.
Matatandaang marami rin ang naantig sa birthday message ng celebrity para sa kanyang ama nitong nakaraang Pebrero, “Pangalawang birthday mo na hindi ka namin kasama. Kumusta ka na diyan, Pogi? I’m sure okay ka. Happy and at peace. Miss ka namin dito, ‘lam mo ba yun? May isang taon mahigit na rin ang nakakalipas pero hinahanap ka pa rin namin.”
“Miss ko ‘yong boses mo pag kumakanta sa videoke, ‘yong mga patawa mo na minsan hindi nakakatawa pero sa sobrang corny matatawa na rin kami. I really hope you’re in a better place, ‘yong wala nang pain at kalungkutan. Sarap siguro diyan. Parati kang nasa puso namin. Happy birthday, my orig valentino. I miss and I love you so much!” pagpapatuloy niya.
[RELATED – ‘Kumusta ka na diyan, Pogi?’ Ice nagbahagi ng nakaaantig na birthday message para sa namayapang ama]
Nobyembre 2020 nang mamaalam ang ama ni Ice na nakapagbilin pa na gusto nitong mga pulang bulaklak ang gamitin sa kaniyang burol. Hanggang sa huling sandali raw ay gusto ng kanyang tatay, na itinuturing na komedyante ng pamilya, na maging masaya ang lahat hanggang sa tuluyang paglisan niya.
“Naihanda kami ni Daddy. Nahanda siya [Ice] ni Daddy na in the last two weeks, nagpatawag siya, talagang nag-spend kami ng time with him. Kinantahan siya ni Ice. Lahat ‘yong mga hindi nasabi,” kuwento ng better half ni Ice na si Liza Diño-Seguerra. “Talagang napakaganda ‘yong ano, naghiwalay man, ‘yong when he passed away, masaya. Masaya ‘yung spirit.”
