Humamig ng mahigit sa 10 milyong views na ang video ng Kapuso Mo Jessica Soho (KMJS) tungkol sa kuwento ng pag-iibigan ng vlogger na si Boy Tapang at ng kaniyang Filipina-American na girlfriend sa loob lamang ng 24 oras.
Ang 10M views na ito ay sa Facebook video po lamang na ibinahagi ng KMJS sa kanilang page at hindi pa kasama rito ang views sa You Tube na halos isang milyon na rin.
Kinakiligan at naghatid ng katatawanan sa mga viewers ang kuwento nina Boy Tapang at ng kaniyang kasintahang si LJ Satterfield, isang magandang dilag na taga-Cebu.
Dito ay ikinuwento ng Pinoy vlogger na nakilala, napaibig at tuluyan niyang napasagot ang kaniyang magandang kasintahan na kilala na rin ngayon bilang Girl Tapang.
Kuwento ni Boy Tapang, dumaan sa kaniyang newsfeed sa FB ang larawan ni LJ at kaagad siyang naakit sa kagandahan ng dalaga kaya nag-chat siya rito.
Bagama’t hindi kaagad nakatanggap ng reply, matiyaga umano siyang naghintay hanggang ma-notice ni LJ ang kaniyang mensahe.
Ayon naman kay LJ, pinanood niya ang mga content ni Boy Tapang at humanga siya sa ‘katapangan’ ng lalaki.
Bukod umano doon ay nagustuhan niya rin ang pagiging humble, kuwela, at kakulitan ng binata na laging nagpapasaya sa kaniya.
“Lalo akong na-amaze kasi he’s so humble, he’s so kind, he’s so God fearing. Ako po talaga nagustuhan ko sa kaniya, mahilig siyang tumulong sa pamilya niya. Hindi po talaga ako nakatingin sa panlabas na itsura,” wika ni LJ.
Si Boy Tapang, o Ronnie Suan sa tunay na buhay, ay nakilala at sumikat sa social media dahil sa kaniyang kakaibang content na karamihan ay pag-mukbang ng mga hindi pangkaraniwang pagkain o exotic food gaya ng mga hilaw na hayop at insekto.
Samantala ang kanilang feature story ni LJ ay ipinalabas sa KMJS nitong nakaraang Linggo, Enero 15.
Panoorin: