Inumpisahan na umano ng BDO ang pagpoproseso sa reimbursement ng mga kliyenteng naapektuhan ng malawakang hacking noong isang araw na nauwi sa pagkawala ng ilang milyong pera ng mga depositors.
Ayon sa pahayag na inilabas ng bangko nitong Martes, Disyembre 14, nagsimula na ang proseso ng pagre-reimburse ng nasa 700 kliyenteng nabiktima ng “recent online fraudulent transactions.”
Imahe mula sa SMIC
“We have requested our clients to go to their branch of account and submit documentation to get the refund. The Bank will shoulder the losses perpetuated by this cybercrime incident,” dagdag pahayag ng BDO.
Noong isang araw ay dinagsa ng reklamo ang Facebook page ng BDO Unibank mula sa mga customer na nagulat matapos mabawasan ang kanilang perang nakadeposito sa account nila sa naturang bangko.
BASAHIN: BDO tiniyak na ibabalik nila ang pera ng mga kliyenteng na-hack ang account
Ayon sa mga biktima, nasa P40,000 hanggang P200,000 umano ang perang nabawas sa kanilang account gayung wala namang dumarating na OTP request sa kanilang cellphone.
Imahe mula sa Krazytech
Napag-alaman sa mga lumabas na ulat na na-hack ang acoount ng ilang kliyente at nailipat ang laman nito sa isang account sa Union Bank sa ilalim ng pangalang ‘Mark Nagoyo’.
Ginamit umano ang naturang pera upang bumili ng Bitcoin cryptocurrency na nagkakahalaga ng P5-M.
Sa kasalukuyan, nakikipag-ugnayan na ang BDO sa National Bureau of Investigation (NBI) at Bangko Sentral ng Pilipinas (BSP) upang matunton kung sinuman ang nasa likod ng insidente.
Ikinasa na rin ng BDO ang karagdagang “security measures” upang hindi na ito maulit pa at maprotektahan ang kanilang bank credentials.
Imahe mula sa Facebook| BDO Unibank
“Most recently, we have required our online banking users to update their passwords. Changing their password improves account security and prevents fraudsters from accessing their hard-earned money,” ayon sa naunang pahayag ng BDO.
Samantala, ibinahagi naman ng BSP na patuloy pa rin ang kanilang imbestigasyon sa nasabing insidente.
“Investigation is still ongoing. Definitely, the BSP is looking at the root cause of why it happened which is part of the investigation,” ani BSP Deputy Governor Chuchi Fonacier sa text message sa Philstar.
Nagsasagawa na rin ng sariling imbestigasyon ang BDO na umaming naapektuhan ng hacking incident ang kanilang “10-year-old web service” na nakatakda nang i-phase out.