Sobrang lakas na ng loob ng mga scammers ngayon. Pati ang one-time-password o OTP na natatanggap ng mga depositors mula sa bangko ay tahasang hinihingi na ng mga ito sa kanilang bibiktimahin.
Ganito ang nangyari sa isang bank depositor batay sa ulat ng “24 Oras.
Image from Pixabay
Tinawagan umano ng babaeng scammer ang depositor na si Joms Donaire at nagpakilala raw ang manloloko bilang empleyado sa anti-fraud department ng isang bangko.
Sinabi raw sa kanya nito na upang ma-secure ang kaniyang bank account ay kailangan magpasok sa bank system ng ilang security questions. Kakailanganin daw nila ang username at ang huling apat na numero ng kanyang automated teller machine (ATM) card.
“Para ma-secure ‘yung account ko kailangan po nila magdagdag ng security questions sa system. So para po ma-activate ‘yun, kailangan po nila ma-verify yung aking username ‘tsaka ‘yung last four digits ng aking ATM,” pagbabahagi ni Ginoong Donaire.
Nagsimula raw ang pagdududa niya sa scammer na babae nang magtanong ito ng mga bagay na hindi niya inaasahan.
“Nagtaka ako kasi tinatanong niya kung capslock ba or hindi ‘yung aking username. So kung ive-verify niya po dapat alam na nila. Bakit pa niya tinatanong?”aniya.
“Nag-try po ako mag-forgot password at ‘yun po kung ano hinihingi ng app, ‘yun din po hinihingi nila,” dagdag pa ni Donaire.
Sa kabutihang-palad sinabi ni Donaire na hindi naman na-hack ang bank account niya.
Image from Pixabay
Nagbigay naman ng babala ang National Bureau of Investigation sa mga bagong modus ng mga scammer ngayon at kung paano iyon maiiwasan.
“Ang unang-una ho kasing telltale sign na bogus ho ‘yung tumatawag sa inyo at nagpe-pretend lang na representative coming from the bank is ‘yung may sense of urgency. Sasabihin nila na may nagta-transact under your account,” sabi ni NBI Cybercrime Division chief na si Vic Lorenzo.
“Kapag humingi ng account information ‘yung tumawag sa inyo, at the same time ‘yung mga password ninyo or OTP, scammer ho ‘yung kausap ninyo,” sabi pa ng NBI official.
Kaya dagdagan ang talas at huwag matataranta kapag may calls na ganyan. Paalalahanan din ang mga kaibigan at kapamilya.
Image from NBI