Viral ngayon sa social media ang video ng ‘paninita’ ni dating senador Jinggoy Estrada sa isang anak na ipinahihiya sa maraming tao ang kaniyang sariling nanay.
Sa naturang video na ibinahagi sa Facebook ni Ryssi Avila, maririnig ang pag-uusap ng mag-ina habang kumakain sa isang restaurant. Pinag-uusapan nila ang umano’y pagpunta ng anak sa Boracay kasama ang mga kaibigan subalit hindi pa raw nakakapagbayad ng gagastusin na nasa P20,000.
Screenshot mula sa Facebook| Ryssi Avila
Maririnig din na mas mataas pa ang boses ng anak habang mahinahon naman ang nanay at pilit pinakakalma ang binata.
“Pag ako hindi nakasama diyan ah, tandaan mo ‘yan,” pagbabanta pa ng anak.
“Ano tatandaan ko?” sagot naman ng nanay.
“Galing-galing mong gumala tapos ‘pag ako hindi puwede. Para namang tanga eh,” padabog na sabi ng binata.
Kung anak lang kita!
Subalit nagkataon namang kumakain pala sa katabing mesa ang pamilya ni Jinggoy na naririnig ang usapan ng mag-ina.
Tila hindi na nakatiis ang dating mambabatas at nilapitan ang mag-ina para sitahin ang anak.
“Sumusobra na ito eh,” bungad ni Jinggoy. “Bakit mo hinihiya ang nanay mo? Ang dami-daming tao, ah.”
Pero hindi nagpatinag ang bata at sumagot pa ito, “Akala mo kung sinong mabait.”
Screenshot mula sa Facebook| Ryssi Avila
Sagot naman ni Jinggoy, “Bakit sinabi ko bang mabait ako? Sinabi ko bang angel ako?”
Sa pagkakataong ito ay humingi na ng paumanhin ang nanay, subalit giit ng dating senador ay sa ina dapat mag-sorry ang anak at hind sa kaniya.
Nag-sorry naman ang binata pero nakatanggap pa rin ito ng pangaral mula kay Jinggoy.
“Alam mo, kung anak lang kita, hindi uubra yang ganyan-ganyan mo eh,” anito.
Scripted?
Maraming netizens naman ang nagsabing tila ‘scripted’ ang pangyayari lalo pa’t kumakandidato ngayon si Jinggoy Estrada upang makabalik sa Senado.
Screenshot mula sa Facebook| Ryssi Avila
Nilinaw din ng nagbahagi ng video na hindi siya bayaran ng anak ni dating Pangulong Estrada lalo pa’t hindi naman siya mahilig sa pulitika at hindi niya rin ‘bet’ si Jinggoy.
Sa kabila nito, marami pa rin ang pumuri kay Jinggoy sa kaniyang ‘paninita’ sa aroganteng anak dahil sa mensaheng dala nito lalo na ngayong tila nakakalimutan na ng kabataan ang paggalang sa kanilang mga magulang.
I-click ang larawan sa ibaba upang mapanood ang buong video:
