Naantig ang batikang broadcaster at tinaguriang King of Public Service na si idol Raffy Tulfo sa mag-amang magsasaka na nag-aararo ng bukirin nang walang kalabaw.
Dahil walang kalabaw, ang mag-ama ang humihila ng araro.
Screenshot mula sa RTIA video
Ayon kay tatay Ismael Malabat, bukod sa pisikal na hirap sa ginagawa ay masakit pa sa damdamin na sila ay pinagtatawanan ng mga tao kapag nakikita sila na nag-aararo na parang kalabaw. Tinitiis na lang daw nila ang lahat.
“First time kong nakakita na tao ang humihila doon sa dapat hinihila ng kalabaw, parang napakahirap gawin ‘to,” sabi ni idol Raffy habang kinakausap si tatay Ismael at asawa nito.
Napag-alaman ni idol Raffy na P38,000 ang kailangan ng magsasaka upang makabili ng isang kalabaw. Dahil sadyang mapagkawanggawa ay ginawa niyang P100,000 ang perang ipinagkaloob.
Ang labis na pera sa pambili ng kalabaw ay maaari raw gamitin ng pamilya ni tatay Ismael para makapagbakasyon ng dalawang linggo.
Screenshot mula sa RTIA video
Inamin ng asawa ni tatay Ismael na kadalasan ay asin lang ang inuulam nila dahil sa kasalatan sa salaping pambili ng pagkain.
Hindi pa nakuntento si Idol Raffy sa perang ibinigay sa magsasaka. Itinodo na niya ang pagtulong na ginawa sa pamilya nito.
Matapos mapansin na butas-butas ang bubong ng bahay nila tatay Ismael ay pinapalitan niya iyon ng mga bagong yero.
Screenshot mula sa RTIA video
Ipinamili rin nila ang pamilya ng magsasaka ng mga gamit na kailangan sa bahay. Kabilang ang kama, kutson, bentilador, kumot at mga kurtina na ang staff mismo ng Raffy Tulfo In Action ang nagkabit.
Kumpleto rin ang mga ibinigay na gamit sa kusina tulad ng kaldero, kawali, sandok, mga plato, baso at iba pa.
Higit sa lahat isang flat screen TV ang ipinagkaloob sa pamilya upang mapanood nila ang mga programa ni Idol Raffy kabilang na ang Raffy Tulfo In Action.
Kaya naman lubus-lubos ang pasasalamat ni tatay Ismael at buong mag-anak niya sa biyayang natanggap mula kay idol Raffy.
Screenshot mula sa RTIA video