Binayo ng malakas na bagyong Odette ang Visayas at Mindanao na nagdulot ng malaking pinsala sa maraming probinsya.
Ang dalang hangin ng bagyo ay may bilis na 195 kilometro kada oras at ang lakas ng bugso nito ay umabot sa 240 kilometro kada oras kaya itinaas ang Storm Signal No. 4.
Image from Reportr
Dalawang beses nag-landfall sa lalawigan ang bagyong Odette kaya libo-libong mga residente ang inilikas mula sa kanilang mga tahanan upang pansamantalang magkanlong sa mga evacuation centers.
Pero sa kabila ng pagkakaroon ng mga evacuation centers, pinili ng ilang pamilya sa Sitio Cabuyagan ng Barangay Tigbawan na manatili sa loob ng mga man-made tunnels.
Base sa ilang larawan na ibinahagi ng isang residente, ang tunnels na ginawa ng mga residente ay may mga kahoy sa loob upang hindi iyon gumuho. Hindi kalakihan ang bawat tunnel. Isa hanggang dalawang pamilya lang ang magkakasya roon, depende sa bilang ng miyembro ng pamilya.
Ginawa umano ng mga residente ng naturang sitio ang mga tunnel kasunod ng karanasan nila sa super typhoon Yolanda noong taong 2013.
Ayon kay Leyte Municipal Councilor Alex Dagandan ay nagtanda ang mga residente nang manalasa ang Yolanda kaya sa tuwing may parating na malakas na bagyo ay doon sila nagkakanlong.
“Sa tuwing may paparating na bagyo ay nagtatago sila sa ginawa nilang tunnel,” sabi ni Councilor Dagandan.
Image from Sharon Evite
Nasa sampu raw ang mga man-made tunnel doon.
May ilang netizens ang nagpahayag ng pangamba na baka gumuho amg lupa sa ibabaw ng tunnel kapag malakas ang ulan.
Malabo naman daw mangyari ang ganoon dahil nasa mataas na lugar iyon at sa taniman ng copra kaya matibay ang lupa. Hindi rin naman daw makapal ang lupa sa ibabaw ng tunnel kaya hindi mapanganib sakaling gumuho man iyon.
Ayon sa mga residenteng gumagamit ng tunnel, noon pa man ay ganoon na raw ang ginagawa ng kanilang mga ninuno kapag may malakas na bagyo sa kanilang probinsya.
Image from Sharon Evite