Ikinatuwa ng mga kababaihan ang ginawa ng House of Representatives na magkaroon ng malinaw na legal provision na maaari nang panatilihin ng isang married woman ang kanyang maiden surname o ang apelyido sa pagkadalaga.
Image from Pexels
Noong Miyerkules, ika-1 ng Disyembre, ay inaprubahan na ng mababang kapulungan ng Kongreso sa ikatlo at pinal na pagbasa ang House Bill 10459 na nagnanais na bigyang kalinawan ang Article 370 ng Republic Act (R.A.) 386 na kilala bilang Civil Code of the Philippines.
Sa kasalukuyan, sinasabi sa Civil Code of the Philippines na maaaring gamitin ng isang ikinasal na babae ang kanyang 1) maiden first name at surname at idadagdag ang surname ng napangasawa, 2) maiden first name at surname ng asawa, 3) Buong pangalan ng mister, pero ilalagay ang prefix na “Mrs.”
Sa ilalim ng House Bill 10459 o tinatawag na New Civil Code of the Philippines ay maaari nang gamitin ng married woman ang kanyang maiden first name at surname, bukod pa sa tatlong nabanggit sa R.A. 386.
Layon ng panukalang batas na isulong ang pagkakapantay-pantay ng mga kalalakihan at kababaihan sa harap ng batas sa pamamagitan ng pagbibigay ng proteksyon sa mga karapatan ng kababaihan sa pamamagitan ng pananatili ng kanilang maiden surnames kahit pagkatapos ng kasal.
“Malaking hakbang ito para sa kababaihan, lalo’t hindi natin maipagkakaila na ang pagbabago ng apelyido ng isang babae ay porma ng diskriminasyon sa pagrerelasyon, na tila ba kailangan niyang pantayan ang pangalan ng kanyang asawa,” pahayag ni Representative Arlene Brosas ng Gabriela Women’s Party.
Image from Gabriela Women’s Party
“Pagkilala ito sa identitad ng isang babae na bukod pa sa kanyang asawa, at pagtataguyod ng pagkakapantay-pantay ng babae at lalaki sa batas,” ayon naman sa Facebook post ng Gabriela Women’s Party.
Paglilinaw ni Makati City 2nd District Representative Luis Campos, Jr., co-author ng panukalang batas, hindi inamyendahan ng House Bill 10459 ang R.A. 386; bagkus ay nilinaw lang nito ang mga apelyido na maaaring gamitin ng mga kababaihan pagkatapos ng kasal.
“This would empower women since she would now have a clear legal provision stating that they have an option to retain their last name even after marriage,” paliwanag niya.
Image from Pexels