Pinalagan ni Health Secretary Francisco Duque III ang paratang ni Foreign Affairs Secretary Teddy Locsin tungkol sa diumano’y panibagong ‘kapalpakan’ ng kalihim ng DOH sa pagbili ng syringe mula sa Estados Unidos.
Giit ni Duque sa panayam ng dzBB, walang katotohanan ang paratang ni Locsin bukod pa sa paglabag sa batas ang nais mangyari ng huli.
Imahe mula sa Inquirer
“Wala, wala ‘yun, hindi totoo ‘yun. Kasinungalingan ‘yun, puro kasinungalingan ‘yun. Hindi totoo ‘yan,” paliwanag ni Duque.
“Ang gusto ni Locsin, sumunod kami sa gusto nung supplier na presyo. Ay hindi naman pwede ‘yun. Hindi naman kami g*go para gawin ‘yun. Meron tayong batas diyan—Republic Act 9184,” dagdag ng kalihim.
Ayon kay Duque, inalok sila ng P411.5-M para sa 50 milyong hiringgilya kung saan lumalabas na nasa P2.38 ang presyo ng bawat isa nito. Hindi raw nila ito kinagat sapagkat lalabag ang naturang kontrata sa RA 9184 at makakasuhan naman sila ng graft.
Imahe mula sa Japan Times
Ang ikinasasaman lang umano ng kaniyang loob ay kung bakit idinadaan sa mga tweet ng DFA official ang hinaing nito at hindi na lang siya tinawagan muna. Ipaaabot niya rin umano sa Malakanyang ang nasabing isyu, ayon kay Duque.
‘Unfair’ ang alegasyon
Sa hiwalay na panayam naman sa ABS-CBN News, ipinaliwanag din ni Duque na mismong ang supplier ang nag-back out matapos malamang hindi kaya ng DOH ang budget na inaalok sa kanila.
“His allegation is very unfair. There is no basis. How can he say we dropped the ball when the company backed out?” giit ng kalihim.
Screenshot mula sa Twitter
Ani Duque, nais ng banyagang kompanyang Procurenet na sumali sa bidding para makabili ang Pinas ng 50 milyong hiringgilya subalit umatras ito nang malamang nas P119.5-M lamang ang approved budget ng DOH para dito.
“Adjusting the price in favor of a bidder would be clear graft,” wika pa nito.
Magugunitang ibinulgar ni Locsin noong isang araw ang umano’y nasayang na oportunidad ng Pilipinas para makabili ng 50 milyong syringes.
“We dropped the ball again; this time offer of 50 million syringes,” anito sa isang tweet.
Screenshot mulas sa Twitter
Sa kaniyang mga sumunod na tweet, tinawag din ng kalihim na ‘hallucinatory’ ang presyong USD 4.7 cents na nais ng DOH dahil ang pinakamababa umanong presyo nito sa merkado ay USD 7 cents.
Disyembre noong nakaraang taon nang unang ginamit ni Locsin ang katagang ‘dropped the ball’ bilang paglalarawan sa kapalpakan ng DOH sa nasayang na oportunidad ng bansa na makabili sana ng COVID vaccine na darating ng Enero 2021.
Ito ay bunsod na rin umano ng kabiguan ng DOH na kumpletuhin ang mga dokumentong hinihingi noon ng Pfizer.