Sa edad na otsenta ay masasabing nasa dapithapon na ng kanyang buhay ang matandang nakilala bilang si nanay Aurora ng Pangasinan.
Tatlo ang anak niya na pawang may mga edad na rin. Ang isa ay magsasaka na mayroon nang sariling pamilya kaya’t nakabukod na ito ng tirahan.
Ang dalawang anak na kapiling niya ay may edad na 52 at 59. Parehong may special needs ang mga ito, ayon sa kapitbahay nilang si Aling Luchie na tumulong sa kanila upang maidulog kay idol Raffy Tulfo ang kanilang kalagayan.
Si nanay Aurora ang mag-isang nagtataguyod sa dalawang anak na may special needs. Tumutulong naman ang apo niya sa isang anak, subalit paminsan-minsan lang dahil hirap din sa buhay.
Naantig si idol Raffy sa panawagan ni nanay Aurora kaya naman agad siyang nangako ng agarang tulong para sa mag-iina.
“Tumatawag ako sa inyo, Señor Raffy dahil sa ganitong kalagayan ko na halos hindi na ako makapagsalita sa hina ng katawan ko. Humihingi ako ng tulong sa inyo para nang sa ganoon matulungan n’yo pa ako madugtungan ang buhay ko para sa mga anak ko dahil ang mga anak ko may mga diperensya sila,” panawagan ni nanay Aurora kay idol Raffy.
“Lalung-lalo na mahina na po ako kaya humihingi ako ng tulong sa inyo para nang sa ganoon lumakas pa ako. Panginoon ko, gusto ko pang humaba ang buhay ko . Hindi na ako halos makahinga sa hirap ng buhay ko. Baka sakaling matulungan n’yo ako sa ganitong kalagayan ko ngayon, sir Raffy,” sabi pa ng matanda na lalong nagpaantig sa damdamin ni idol Raffy.
Umabot sa P100,000 ang kabuuan ng tulong ni idol Raffy sa mag-iina, kabilang na ang limang biik na aalagaan nila.
Binigyan din ni Raffy Tulfo ng tulong ang kapitbahay na si aling Luchie. Ten thousand ang pangako niya kay aling Luchie, pero sinabi ng mabait na kapitbahay na itutulong raw niya iyon sa isang batang nangangailangan.
Lalong humanga si idol Raffy kay aling Luchie kaya P28,000 na ang ibibigay niya rito at tutulungan din ang batang sinasabi nito na nanganganilangan ng tulong.
Panoorin ang RTIA video: