Bongga pala ang regalong ibinigay ni Gerald Anderson sa nobyang si Julia Barretto noong Pasko … isang Rolex watch.
Mapapanood sa vlog ni Marjorie Barretto ang pagreregalo ni Gerald kay Julia. Sa sobrang saya nang makita ang laman ng gift box ay agad niyang niyakap ang boyfriend. Sabi ni Julia, ngayon pa lang siya nagkaroon ng ganoong relo, na agad niyang isinuot.
Screenshot from Marjorie Barretto’s vlog
“This is my first Rolex,” sabi ng magandang aktres.
Bukod kay Julia ay niregaluhan rin ng aktor ang mga kapatid nito. Isang scented candle para kay Dani Barretto at isang malaking Hello Kitty para sa bunso nilang kapatid na si Erich.
Ayon kay Leon Barretto, ang lalaking kapatid ni Julia, pangarap daw talaga ni Erich na magkaroon ng Hello Kitty stuff toy na binigyang katuparan ni Gerald noong Christmas Day.
Marami ring natanggap na gift si Gerald mula sa Barretto family.
Iyon ang kauna-unahang Christmas ni Gerald kasama ang pamilya ng nobya.
Screenshot from Marjorie Barretto’s vlog
Kamakailan lang, inamin ni Julia na hindi na siya bumibili ng mga mahahaling gamit para sa sarili mula nang maipatayo niya ang sariling bahay at solong nanirahan doon.
Wais na siya sa pera at proud “kuripot.”
Aniya, sa halip na bumili ng mga designer shoes and bags na hilig niya noong kabataan niya, napupunta na raw ang budget niya sa mga bayarin sa kanyang household tulad ng kuryente.
Screenshot from Marjorie Barretto’s vlog
“Hindi na ako ‘yung before na parang every week may bago akong sapatos, may bago akong bag. Hindi na ako ganon. Napupunta na lang sa electric bills, sa amortization dues,” aniya.
Mas napapahalagahan na raw niya ngayon ang perang kinikita at ‘yung oras at energy na ginugugol niya para kumita ngayong solo na lang siyang namumuhay sa sariling bahay na hindi naman kalayuan sa bahay ng inang si Marjorie.
“Nung bata pa ako, magastos talaga ako. Pero ngayon na I live on my own and ako na nagra-run ng household, tipid na ako. Ano na ako, kuripot na.”