Sinagot ni Robin Padilla ang netizen na nagsabing pang-Grade 6 ang mga gusto niyang ihaing plataporma sa kaniyang kandidatura bilang senador.
“Hoy Robin Padilla, tatakbo kang senador pero ‘yong plataporma mo pang Grade 6 class President,” sabi ng netizen.
Imahe mula sa Facebook | Robin Padilla
Bago iyon ay nagbahagi si Robin ng listahan ng kaniyang mga plataporma ngunit ngayon ay burado na ito mula sa kaniyang Facebook page.
Ani Robin, sa halip na ang lalim ng mga plataporma ang busisiin, dapat tingnan kung talagang may nagawa na ang mga kandidato.
“Wala pa rin nagagawa ‘yong mga kandidato ninyo na sa ibang bansa pa nagsipag-aral. Mga paulit-ulit nang nakaupo at nangangako. Galing na galing kayo sa plataporma dahil napakasarap basahin, ‘yong iba palaliman pa sa wikang Ingles pero bakit po kaya wala pa ring nangyayari sa plataporma nila at sa ibinoto ninyo?”
Masaya na raw si Robin kapag naibigay niya ang mga basic na pangangailangan ng mga kababayan.
Imahe mula sa Facebook | Robin Padilla
“Ako po maayos ko lang po ang basic needs ng mga Pilipino katulad po ng pagkain sa lamesa, tamang sahod nila, may tirahan, maging parehas hindi man sa katayuan kundi sa karapatan,” paliwanag niya.
“Hindi po kailangan ang kumplikadong plataporma na puro porma lang ang nangyayari at drama lang sa media pero pag nanalo ay limot na. Aksyon po ang kailangan,” sabi niya.
Dagdag niya rin, ‘di bale nang pang elementary ang plataporma basta alam ang mga problemang kailangang solusyonan.
Imahe mula sa Facebook | Robin Padilla
“Mabuti pa po ‘yong grade school, batid na ang problema sa bayan niya,” dagdag ni Robin.
“Mula’t sapul puro genius na ang iniluklok. Nasaan na ang Pilipinas ngayon? Baon sa utang… Anong nararamdaman ninyo? Umasenso ba kayo sa plataporma ng mga genius?” sabi pa niya sa comment section.
Sa kabila nito ay sinabi niyang hindi siya apektado sa mga bumabatikos sa kaniya. “Hindi tayo nagpapaapekto diyan sa mga ‘yan, mga utol. Sinasagot lang natin para mabatid din nila ang tama.”
Tumatakbo sa pagka-senador si Robin sa ilalim ng Partido Demokratiko Pilipino-Lakas ng Bayan (PDP-Laban).