Isinusulong ngayon ng isang mambabatas sa Mababang Kapulungan ang panukalang nais pahabain ang termino ng pangulo, pangalawang pangulo at iba pang elected officials.
Ang Resolution of Both Houses No. 7 ay inihain ni Pampanga 3rd District Representative Aurelio “Dong” Gonzales Jr. noong Enero 7 kung saan hinihiling dito na magconvene ang Senado at Kamara bilang isang constitutional assembly upang talakayin ang isyu.
Rep. Aurelio “Dong” Gonzales Jr.| Screenshot mula sa YT
Iminumungkahi ng naturang resolusyon na gawing limang taon ang termino ng pangulo at pangalawang pangulo subalit maaari silang tumakbo muli para sa isang reelection.
“A six-year tenure is too short for a good President, especially if he is confronted with a crippling crisis like the COVID-19 pandemic, which continues to wreak havoc on our health and economy and whose end is not yet in sight. It may take more than one presidency before the nation can fully recover from this catastrophe,” paliwanag ni Gonzales nitong Linggo.
“On the other hand, if we do not like the way the President is governing, we can vote him out of office a year earlier if his term of office is five years,” dagdag pa ng kongresista.
Imahe mula sa CNN PH
Bukod dito, ipinagbabawal din ng panukalang batas ang muling pagtakbo ng pangulo sa anumang elective post kapag nakumpleto na niya ang kaniyang termino. Ang boto para sa presidente ay magiging boto rin para sa kaniyang running mate na bise presidente.
Sa ganitong paraan umano ay mapapalakas ang political party system at matitiyak na magkasundo ang dalawang pinakamataas na opisyal sa pagpapatakbo ng bansa.
Maliban sa pangulo at pangalawang pangulo, nais din ni Gonzales na gawing ‘5 years with one reelection’ ang termino ng mga kongresista. Masyado umanong maikli ang tatlong taon para sa kanila dahil ang huling taon ng kanilang pagseserbisyo ay napupunta na lamang sa mga gawaing may kinalaman sa eleksiyon.
Imahe mula sa PNA
Sa kasalukuyan, ang termino ng isang kongresista ay tatlong taon subalit maaaring sumabak sa reelection nang dalawang beses.
Nasasaad din sa resolusyon na lahat ng local officials, maliban sa barangay officials, ay magkakaroon ng ‘five-year term’ at “no official shall serve for more than two consecutive terms.”
Wika pa ni Gonzales, ang kasalukuyang batas para sa termino ng mga opisyal ay mahigit 34 taon nang umiiral at ngayon ay napapanahon na umano para baguhin ito upang palakasin ang political system sa bansa para mas mabilis na pag-unlad.