Ibinahagi ng mga manghahabi sa Payatas ang kanilang saloobin sa mga likhang ginawa ng mga Amerikanong designer na mukhang door mat o tinatawag ng mga Pilipino na “basahan” o “sala-sala.”
Ang mga furniture at textile designers na sina Franny Capone at Elise McMahon, na ang obra ay itinampok ng Vogue, ay nakatanggap ng batikos dahil sa hindi pagkilala na ang mga Pilipino ay matagal nang gumagawa ng mga produktong ito, ayon sa ulat ng “24 Oras” ni Oscar Oida noong Huwebes, Pebrero 17.
Sinabi ni McMahon na sinusubukan nilang matuto nang higit pa kaugnay sa kanilang mga pagsisikap na magbigay-liwanag sa pandaigdigang basura sa fast fashion sa United States.
“Through these comments last night and today, I learned about this amazing weaving style, ‘basahan,’ using T-shirt material that has long been happening in the Philippines and have been rushing to educate myself since,” wika ng taga-disenyo.
“This project we just announced is intended to motivate and share info about global fast fashion waste with the American public as we have a huge habitual waste problem.”
Sinabi ng mga manghahabi na natutuwa silang makita ang mga disenyo na kilala sa ibang bahagi ng mundo, ngunit umaasa rin silang ang kanilang trabaho ay magkakaroon ng parehong pagkilala at halaga.
Ayon sa sala-sala maker na si Regina Balili, bultuhan nilang ibinebenta ang kanilang door mat at basahan sa halagang 15 pesos kada piraso.
Ani Regina, “Diyan namin kinukuha ’yung pangkain namin, bigas, ulam, pambili ng diaper.”
“Maganda nga sana kung may mamimili ng medyo mahal kasi para lumuwag kunti man lang ’yung hanapbuhay namin.”
Si Mycah Gudoy, isa ring maghahabi, ay nagpahayag din ng pag-asa na sana ang kanilang mga produkto ay makakuha ng suporta mula sa gobyerno.
View this post on Instagram