Sinabi ni Vice President Leni Robredo na dapat nang itigil ng mga botante ang paghahanap sa mga kandidatong tumatangging humarap sa kanila. Kailangan umano ng Pilipinas ng isang lider na nagmamadaling tumulong at handang harapin ang sinuman.
Kabilang ito sa mga salitang binitawan ng Presidential bet sa kanyang pangwakas na pahayag sa debate na inorganisa ng Commission on Elections bago ang botohan sa darating na halalan 2022.
Sinabi rin ni VP Robredo na sa kabila ng online disinformation, mayroon silang mga “resibo” para sa mga pagkakataong nagpakita siya sa panahon ng mga sakuna, pandemya, at iba’t ibang krisis.
“Kaya po huwag na nating hanapin ang ayaw namang humarap sa atin. Lahat ng oras, nandito po ako, hinaharap kayo, ipinapakipaglaban kayo,” ayon kay Robredo.
“True leaders show up, and man up. Kaya po sa darating na Mayo, the best man for the job is a woman,” pagtatapos ng nag-iisang babaeng presidential contender.
Sa 10 kandidatong inimbitahan sa debate sa “PiliPinas 2022”, tanging si dating senador Bongbong Marcos Jr. ang wala. Nalampasan niya ang kanyang pagkakataon na tugunan ang mga naiulat na pananagutan sa buwis ng kanyang pamilya, na napagdebatehan ng iba pang mga presidential bets.
Si Bongbong at ang kanyang running mate na si Sara Duterte, sa halip na nasa debate, ay nagtungo sa mga retiradong pulis at sundalo sa Marikina City.
Dati nang nilakdawan ng dating senador ang isang debate at forum na itinanghal ng CNN Philippines at ang panayam ng beteranong mamamahayag na si Jessica Soho sa mga presidential contenders.
Gayunman, dumalo siya sa presidential debate na inilunsad ng SMNI, na itinatag ni Pastor Apollo Quiboloy, nitong nagdaang Pebrero, ngunit wala naman ang ibang presidential contenders pati na rin si VP Robredo. Kasama ni Marcos na dumalo sina Leodegario “Ka Leody” de Guzman, former Palace spokesman Ernesto Abella, at former Defense secretary Norberto Gonzales.
Panoorin ang closing remarks ni VP Robredo:
View this post on Instagram