“Reporter sa araw, sapatero sa gabi.”
Para kay Dano Tingcungco, ang pagpapanatili ng twin disciplines ay isang pangangailangan at isang pagpipilian. Naalala niyang sinabihan siya noon na tumutok na lang sa isa, na sinagot naman niya ng, “But what if I am both?”
Nagmula sa kabisera ng pagawaan ng sapatos sa lugar ng Marikina, ibinahagi ng 36-anyos na si Dano na siya ang third-generation shoemaker sa kanilang pamilya na sumunod sa yapak ng kanyang mga lolo’t lola at mga magulang na nagsimula ng kanilang negosyo noong ’60s.
Kuwento ni Dano, lumaki siya sa lugar na amoy rugby at contact cement, kalabog ng mga martilyo, at huni ng mga sanding machine sa pagawaan.
Natutunan niya ang pag-craft sa panahon ng kanyang pagbibinata, ngunit hindi niya naisip na maging sapatero tulad ng kanyang mga magulang at lolo’t lola.
Noong 2002, pumasok si Dano sa University of the Philippines Diliman at kumuha ng kursong linggwistika. Lumipat naman siya sa journalism; itinuring na ang programa ay isang mas mahusay na paraan upang magamit ang kanyang pagmamahal sa pagsusulat.
Nagtapos siya ng cum laude noong 2007 at natanggap sa GMA-7 bilang researcher noong taon ding iyon. Kalaunan, nakapasok siya bilang isang news correspondent pagkatapos mag-audition; trabahong hawak na niya sa nakalipas na dekada.
Noong Marso, inilunsad ng five-man team ni Dano ang ‘Minsan’; isang leatherwork project na dalubhasa sa bespoke footwear.
Ang pangalan ng tatak, na nangangahulugang “once” sa Ingles, ay “inspired by the transitory nature of things”, aniya. Ngunit binanggit ni Dano na kahit sa impermanence ng buhay, mayroon itong mga aspeto na nilalayong tumagal nang sapat upang magkaroon ng makabuluhang epekto.
Ang footwear ng Minsan ay tinatawag na Pavilion, na inspirasyon ng 1970 Philippine Pavilion sa Osaka Japan na idinisenyo ng National Artist for Architecture na si Leandro Locsin.
Ngunit higit sa lahat, sinabi ni Dano na ang tagpi-tagping disenyo ay mayroon ding dimensyon ng sustainability dahil ang karamihan sa ginagamit nilang katad ay pinagtabasan o castoffs, at dapat nilang sulitin ang isang piraso na hindi magiging sapat kahit para sa isang coin purse.
View this post on Instagram