Matapos ang apat na taong pananatili sa ibang bansa, gustong surpresahin ng balikbayan na si Ann lopez Fontilla, mula Canada, ang kanyang pamilya para maging memorable ang kanyang pag-uwi.
Ang 55-anyos na balikbayan ay dating nagtatrabaho bilang isang OFW sa Thailand sa loob ng 20 taon bago siya lumipat sa Canada noong 2011.
“She only contacted me to fetch her from the airport, so I was the only one who knew,” ani Darla dela Cruz, pamangkin ni Ann na kasabwat niya sa surpresa.
“She calls every day via messenger with all her siblings, so when I fetched her, we decided it was best to surprise them while they were on a video call with her,” dagdag pa niya sa featured video ng PhilStar noong Abril 25.
“Surprisingly and luckily, my two other titas didn’t got to work that day.”
Ibinahagi rin ni Darla na sabik na sabik ang kanyang tita Ann na bumalik sa Pilipinas para bisitahin ang kanyang ina na si Aurelia.
Naalala ni Darla na mas pinili niyang kunan ang moment dahil palaging ‘exaggerated’ ang reaksyon ng kanyang mga tiyahin.
Dumating si Ann sa kanilang bahay habang ka-video call ang kaniyang pamilyang nasa Paranaque City noong Abril 7, 2022.
Akala ng pamilya ni Ann ay nakikipag-usap lang sila sa kaniya mula sa Canada sa pamamagitan ng video call hanggang sa lumitaw siya sa harap mismo ng kanilang pintuan at pumasok sa kuwarto ng kanilang ina.
Parang nanalo sa lotto ang reaksiyon ng mga ito nang makita si Ann sa kanilang harapan.
Ang 87-taong-gulang na ina ay labis na natuwa nang makita ang kanyang anak sa personal.
Si nanay Aurelia ay na-stroke umano noong Marso 2022. Sa parehong buwan, sumailalim siya sa isang pacemaker insertion. Kasalukuyan siyang nagpapagaling sa tulong ng physical theraphy.
“Sinabi naman agad sa kanya, but ganun lang talaga po siya mag-react. Actually ‘di rin siya super recovered pa so ‘di pa fully functional ‘yung buong left side niya,” ani Darla.
“And our lola is actually really chill, kalmado po siya na tao and ‘di po kasi siya iyakin. Nakuha po lahat ng mga anak niya hahahaha.”
Si Ann ay may tatlong kapatid na babae at isang lalaki na pinakapanganay sa kanila. Lahat sila ay lumaki umanong malapit sa isa’t isa at hindi kayang patirin ng distansya ang pagmamahal at pagkakabuklod nila.