Opisyal na inendorso ng religious group na Iglesia ni Cristo (INC) ang presidential frontrunner na si Ferdinand Romualdez Marcos Jr. at running mate nitong si Sara Duterte, para sa botohan sa Mayo 9.
Ang influential organization na may bilang na 2.5 milyong miyembro sa buong mundo ay nag-anunsyo sa programa ng balitang “Mata ng Agila” sa Net 25 nitong Mayo 3 ng gabi.
Sa humigit-kumulang 2 milyong miyembro ng pagboto, ang INC members ay inaasahang susunod sa pagpili ng mga kandidato ng mga pinuno ng simbahan kapag sila ay bumoto.
Ngayong linggo, inaasahang mamamahagi ang INC ng mga sample ballot na naglalaman ng mga pangalan ng UniTeam pair at senatorial candidates na sina Jojo Binay, Alan Peter Cayetano, JV Ejercito, Guillermo Eleazar, Francis Escudero, Jinggoy Estrada, Sherwin Gatchalian, Loren Legarda, Robin Padilla, Joel Villanueva, Mark Villar, at Miguel Zubiri.
Kasalukuyang nangunguna sina Bongbong at Duterte sa presidential at vice presidential race, ayon sa pagkakasunod-sunod, batay sa mga survey ng Pulse Asia, Laylo Research at PUBLiCUS na isinagawa noong Abril.
Sa kasaysayan, sinuportahan ng INC ang ama ni Bongbong na si dating Pangulong Ferdinand E. Marcos Sr., sa halalan noong 1965, 1969, 1981 at 1986.
Samantala, taos pusong nagpasalamat sina Bongbong at Sara sa INC dahil sa pag-endorso nila sa tandem.
“Sisikapin po namin na ang tiwalang ipinagkaloob ninyo sa aming tambalan ay magbubunga ng tunay na pagkakaisa ng mga Pilipinong nagmamahal sa Pilipinas at walang alinlangan na sama-samang haharap sa mga pagsubok na daraan sa paghanda ng magandang bukas para sa ating mga kabataan,” ani Bongbong.
“Ang pagpili sa amin ni Apo Bongbong Marcos bilang mga kandidato na inyong sinusuportahan sa pagka-presidente at bise presidente sa darating na halalan ay isang malaking karangalan na may kaakibat na hamong nakatuon sa aming kakayahang mapag-isa ang bansa. Mapagbuklod ang mga Pilipino at maitawid ang sambayanan sa crisis na dulot ng pandemya,” saad naman ni Sara.