Noong Labor Day May 1, sinabi ng Manila Mayor Francisco “Isko” Moreno na tututukan niya ang paglikha ng mas maraming trabaho para sa mga mamamayang Pilipino sakaling manalo siya sa pagkapangulo.
“Importante ‘yun na makapagtrabaho ang tao dahil maraming nawalan ng trabaho,” sabi ni Moreno sa isang chance interview.
Ayon sa Aksyon Demokratiko standard-bearer, hangad din niyang taasan ang standard wage ng mga manggagawa.
“‘Yun bang suweldo ng manggagawa sapat ipamuhay sa kanyang pamilya o kaya ‘di ba sabi ko bababaan ko ang buwis ng kuryente, bababaan ko ang buwis ng krudo para mapamura ang bilihin,” ani Mayor ng Manila.
Nang tanungin kung pumayag siya sa mungkahing P750 na minimum na sahod, sa ngayon ay okay naman daw, “for now.”
“Basta ngayon, okay tayo diyan kung kakayanin ng mga negosyante,” sabi ni Moreno.
“Meron akong isang approach. Mabuhay ang negosyo… ‘wag na magsara, maka survive ang negosyo, makadagdag ng trabaho, tapos dahil kulang na ang suweldo ng tao, babaan ko ‘yung mga presyo ng pangunahing bilihin at gastusin ng tao.”
Aniya, kapag naipasa na ito ng bansa, titingnan niya ang pagwawakas sa kontraktwalisasyon at paglikha ng mga permanenteng trabaho.
“But for now, unawaan eh,” dagdag pa ng tumatakbong pagkapangulo.
Vilma-Ralph endorsement
Samantala, sinabi ni Moreno na nananatili sa kanya ang suporta nina Senator Ralph Recto at Deputy Speaker Vilma Santos-Recto.
Sa isang ulat, hiningan siya ng komento tungkol sa courtesy visit ng presidential rival at Vice President Leni Robredo sa mag-asawang Recto.
“Hanggang ngayon naman. Ganon talaga ang mga disenteng tao na marunong tumanggap ng bisita. And I’m proud of Senator Ralph Recto and Congresswoman Vilma Santos. I’m very proud of them na marunong silang tumanggap ng bisita,” ayon kay Moreno.
“It shows character eh. So I’m really proud of [the] Isko Moreno supporters, mga ordinaryong tao, kasi sila hindi nakikipag away, nakikinig, pero firm sa kanilang paniniwala,” dagdag pa niya.
Sinamahan ni Recto si Moreno sa kanyang mga aktibidad sa pangangampanya sa Batangas, kung saan ang huli ay dumalo pa sa rally ng Team Bagong Lipa ni Recto sa Lipa bilang panauhin.