Inanunsyo ng presumptive Nueva Ecija Second District board member na si Jason Abalos na nakatakda silang magpakasal ng kanyang beauty queen girlfriend na si Vickie Rushton dahil ibinunyag nilang engaged na sila mula noong nakaraang taon.
Ibinahagi ni Jason ang larawan nila ng kanyang fiancee sa kanyang Instagram account nitong Hunyo 2 habang magkayakap silang dalawa at suot naman ni Vickie ang engagement ring.
Sa kanyang caption ay nagpahayag ng pasasalamat si Jason sa Diyos.
Aniya, “Habambuhay ko pasasalamatan ang Panginoon sa buhay mo Baba. Patugtugin na ang kampana!”
Idinagdag din ng aktor ang petsa na Setyembre 1, 2021 sa caption, na tila nagpapahiwatig na ang proposal ay naganap noong nakaraang taon.
“9/1/21 she said ‘s’yempre.'”
Sa Instagram post naman ng Mutya ng Pilipinas International 2011 titleholder ay ibinahagi niya ang parehong larawan na may caption na, “So, Baba and I have been keeping a little secret.”
“When the time is right I, the Lord, will make it happen – Isaiah 60:22,” dagdag pa niya.
Binati naman ng kapwa celebrities ang magkasintahan kabilang sina Christopher Roxas, Joross Gamboa, Nikki Valdez, Max Collins, Loisa Andalio at iba pang mga celebrities.
“Gratz bro. Welcome sa meaning ng totong buhay.”
“Congrats!!!!!!! Kasalan na yan!!!!!”
“Sa wakas! Panalo na nung election panalo pa sa pag-ibig. Ikaw na! Congrats Brotherness!!”
Nagkomento rin ang eventsbymissp, ang organizer ng mga events na matatandaang nag-organize ng gender reveal event ng couple na sina Cong TV at Viy Cortez.
Aniya. “Yes!!! Patugtugin na ang kampana! see you tomorrow! Love you both!! @vimrushton.”
Unang nagkakilala ang dalawa noong 2010, sa isang “Kapamilya Karavan” event sa Bacolod.
Mula noon ay sinuportahan nila ang isa’t isa sa kani-kanilang mga pagsusumikap, kung saan sinuportahan ni Jason si Vickie nang lumaban ito at nanalo ng first runner-up sa Binibining Pilipinas 2018.
Inamin din ni Jason sa isang panayam noong Marso 2019 na gusto na niyang magpakasal at magsimula ng isang pamilya, kahit na hindi pa handa si Vickie para rito noong panahong iyon.