Ipinaliwanag ng isa sa mga hurado ng Binibining Pilipinas 2022 na si Cecilio Asuncion kung bakit naka-shorts lamang siya sa naganap na coronation night nitong Linggo ng gabi.
Sa isang Facebook post, sinabi ng Founder at Model Director ng Slay Model Management sa Los Angeles, California na pinili niyang magsuot ng gawang Pinoy.
“Sa lahat na nagtatanong bakit ako naka shorts, ito ay dahil pinili kong magsuot ng gawa ng Pinoy na designer na si Avel Bacudio na mula sa tela na galing sa Mindanao at ang bag ko naman ay gawa ni Zarah Juan,” pahayag niya.
Samantala, binati naman niya si Binibining Pilipinas 2022 1st runner up Herlene Nicole Budol na siyang tinanong niya sa question and answer portion ng pageant.
Tinanong ni Asuncion si Herlene kung ano ang pinakamahalagang transpormasyon na nangyari sa kaniya sa Binibining Pilipinas.
Tugon niya, “Para sa akin, isang karangalan na nakatuntong ako dito sa Bb. Pilipinas bilang isang Binibining hindi inaasahan. Para sa akin, ang sarap palang mangarap. Ang sarap mangarap. Walang imposible. Isa po akong komedyante na laki sa hirap. At ang aking transpormasyon ay ang magbigay ng inspirasyon because I know for myself that I am beautiful, because I know for myself that I am uniquely beautiful with a mission. Salamat po.”
Sang-ayon naman ang hurado kay Herlene at sinabing tunay na masarap mangarap dahil walang imposible.
“It has been an amazing homecoming after 22 years, thank you to Binibining Pilipinas for having me as a judge! Tama ka Herlene, ang sarap mangarap at walang imposible!” aniya.
[RELATED: Herlene Budol hakot awards sa Bb. Pilipinas 2022]
“Matuto tayong mahalin ang Tagalog. Parte ito ng kultura natin at dapat hindi ikahiya… Mabuhay ka, Herlene Hipon Budol at sa lahat ng kasali sa taong ito.”
Dagdag pa ni Asuncion, bagama’t mahigit dalawang dekada na siyang nasa ibang bansa ay hindi niya nakalimutang magsalita ng Filipino dahil sa pagmamahal niya sa bayan.
“I have lived in America for 22 years and derecho pa rin ako magtagalog dahil mahal ko ang bansa ko.”
Mensahe niya naman sa mga bumabatikos sa kaniyang suot: “Sana magsumikap kayo at balang araw, ma-invite rin kayo mag judge. Love you, mean it!”