May forever na, may P50k cash incentive pa ang mga mag-asawang magdiriwang ng kanilang ika-50 anibersaryo sa Malaybalay City, Bukidnon matapos ang inilabas ditong “Golden Wedding Anniversary Ordinance.”
Ayon sa co-author ng ordinansa na si Councilor Niko Aldeguer, layunin nitong bigyan ng pagkilala ang mga mag-asawang may matatag na samahan lalo na at ang pamilya ang itinuturing na pundasyon ng lipunan.
Imahe mula sa Unsplash | Joshua Hoehne
Ayon sa inilabas na ordinansa, nais nitong hikayatin ang mga mag-asawa na panatilihing matatag ang kanilang pagsasama.
“To encourage the continuity of faithful union of married couples and respect the sacrament of marriage vows… in order to promote and save family solidarity and our long Filipino tradition, an incentive will be given to those who will celebrate their golden wedding anniversary,” saad sa ordinansa.
Ani Councilor Aldeguer, bihira na lang ngayon ang mga mag-asawang umaabot ng ika-50 anibersaryo kaya marapat lang na kilalanin sila.
“In these times, it is seldom we get to see marriages reaching 50 years. This is a way of recognizing their contribution to the community because of their strong family and foundation to our society,” aniya, ayon sa PNA.
Maaari itong matanggap ng mga permanenteng residente ng Malaybalay sa loob ng anim na taon.
Sakop din ng ordinansang ito ang mga Muslim at iba pang tribal polygamous weddings ngunit tanging ang unang kasal lamang ang makatatanggap ng incentive.
Imahe mula sa Unsplash | Nina Hill
Upang makatanggap ng P50k incentive, dapat ay valid ang kasal at naka-register sa City Civil Registry ng Malaybalay City. Hindi na makatatanggap nito ang mga mag-asawang hiwalay, kahit hindi pa ito dumadaan sa legal na proseso.
Nagpasalamat din si Councilor Aldeguer sa kaniyang co-author na si Louel Tortola at sa mga miyembro ng city council sa pagsuporta nito sa ordinansa.
Samantala, sa comment section ng kaniyang anunsyo sa Facebook ay nilinaw niyang iyong mga magdiriwang lang ng kanilang ika-50 anibersaryo matapos ilabas ang ordinansa ang makatatanggap ng pabuya.