Ano mang hirap ng mga hamon sa buhay ang ating kaharapin ay makakaya natin ito sa pamamagitan ng ating pagtitiyaga.
Katulad na lamang ni Teacher Mary Grace Millama na bumagsak nang 17 beses sa LET board exam ngunit sa ika-18 try niya, sa wakas ay nakapasa rin siya at nasungkit ang ‘Licensed Professional Teacher’ status.
Ayon sa ‘Philippine Star’ kailangang i-manage ni Teacher Mary ang lahat ng responsibilidad niya sa pagiging Teacher, pagre-review at pagiging isang ina.
Tuwing weekdays ay karaniwang inilalaan ng Teacher ang kanyang tungkulin sa pagtuturo sa Bulacan Standard Academy.
Sa weekends ay nakatutok siya sa pagre-review para sa June 2022 LET.
Nakadidismaya man, inamin ni Teacher Mary na may mga pagkakataong naisipan niyang talikuran na ang kanyang mga pangarap ngunit pinili niyang hindi siya sumuko.
Nang sa wakas ay lumabas na ang resulta matapos siyang mag-take ng board exam, nag-aalinlangan siya na makita ang listahan ng mga pumasa at tanging asawa niya ang nagsabi sa kanya na nakapasa siya sa board exam. Kaya naman laking pasasalamat ng Teacher dahil nagbunga na ang kanyang paghihirap.
Tiniyak naman niya na huling take na niya ang recent board exam kung saan naging inspirasyon niya ang kanyang pamilya kasama na ang kanyang dating colleagues.
Matapos makamit ang ‘Licensed professional teacher’ status, nanatili si Teacher Mary sa pagtuturo sa Bulacan Standard Academy.
Dito siya nagtatrabaho bilang isang junior high school instructor sa loob ng 23 taon mula noong siya ay nagtapos ng kolehiyo.
Umaasa si Teacher Mary na ang kanyang mapait na paglalakbay ay magbibigay inspirasyon sa mga indibidwal na huwag sumuko sa kanilang mga pangarap sa kabila ng mga pagkabigo.
“Sa mga katulad ko na nangangarap, sumubok, at nabigo sa dalawang beses o higit pa, ang masasabi ko po sa inyo, sana ‘wag po kayo mawalan ng pag-asa. Ilagay ninyo po sa inyong puso’t isipan na kung hindi man tayo or ‘di man tayo magtagumpay ngayon baka may balak si Lord, may plano si Lord para sa atin na mas higit na mas maganda.”