Maraming netizens ang naantig sa ibinahagi ng isang Facebook user na si AngeL’z Dacillo sa Facebook group na ‘Dogs Lovers Philippines’ kung saan makikita sa larawan ang kanyang kinupkop na aso na nagngangalang Hanna.
“Halos buong buhay niya sa kalsada siya natutulog, sino ba naman ako para ipagkait sa kanya ang kaginhawaan kahit papano,” saad niya sa kanyang post.
Ayon sa ‘Pilipino Star Ngayon Digital,’ naglalakbay umano si Hanna ng ilang kilometro araw-araw upang makakain lamang sa bahay ni Maam Sonia, founder ng DARV (Davao Animal Rescue Volunteers)
Halos isang buwan umano niya itong ginagawa. Dahil sa kalagayan ng aso ay ni-rescue na lang ito ni Maam Sonia .
Kuwento ni Angel, nasa pangangalaga niya ngayon si Hanna.
Habang ginagamot umano ang aso dahil marami itong galis sa katawan, pansamantala muna itong ikinukulong sa cage upang hindi nito mahawaan ang ibang aso ni Angel.
“Sa ngayon nasa pangangalaga ko po siya. Actually naka-cage po talaga para kasi ginagamot pa siya at para hindi mahawan ‘yung ibang dogs ko.”
Binubuksan naman daw ni Angel ang cage ni Hanna kapag iihi or dudumi ito at bumabalik din pagkatapos, ngunit nagtaka ito nang hindi niya ito makita sa kanyang cage at kung saan saan pa niya ito hinanap.
Natagpuan na lamang ni Angel ang aso na nakahiga na sa kanyang kama. Dahil dama ni Angel ang pinagdaanan ni Hanna ay pinabayaan na lamang niya itong matulog nang mahimbing at makapagpahinga.
“Pag off ko inu-open ko lang ‘yung cage niya para makalabas at maka poop sya. Usually [pagtapos] niya gawin lahat ‘yun bumalik siya sa cage niya, nagtaka na lang ako ba’t wala siya sa cage niya hinanap ko siya kung saan saan nandon lang pala siya sa kama ko natutulog kaya hinayaan ku lang po siya kasi alam ko ‘yung pakiramdam na halos buong buhay siya sa kalsada natutulog sa semento or sa lupa,” dagdag pa nito.
Ilang netizen naman ang nagpasalamat sa kanya dahil sa pag-ampon nito kay Hanna.
“Thank you sa pagkupkop kay doggie, God bless you po.”
“You’re a good samaritan with her/him sila talaga ‘yung mga ‘di nang-iiwan at loyal sa atin treat them as a family.
“Sana lahat po katulad niyo mapagmahal sa alaga kasi may buhay din sila parang tao may pakiramdam nasasaktan din sila. Sana ituring natin silang kapamilya hanggang sa dulo ng buhay nila. More blessing po sa inyo. Godbless po.”