Kinatuwaan ng social media users at maging ng mga kilalang personalidad ang unang concept photoshoot ng cute na cute na celebrity baby na si Dylan Jayde Ho; ang anak nina Kapuso Drama King Dennis Trillo at Kapuso Ultimate Star Jennylyn Mercado. Ang munting anghel nina Dennis at Jennylyn, nagmala-Elton John lang naman!
Sa Instagram, ibinahagi ni Jennylyn at ng Cocoon Studios PH ang mga larawan ni Dylan na kuhang-kuha ang ayos ni Elton sa The Muppet Show.
“Elton Jayde on the keys!” saad ni Jennylyn sa caption ng larawan, kung saan binanggit din niya ang ninong ni Dylan, ang designer na si AJ Alberto na nasa likod ng kamangha-manghang mini version ng costume ni Elton.
Sa kasalukuyan ay labis ang tuwang nadarama nina Jennylyn at Dennis dahil sa kanilang anak.
“Masaya, sobrang saya. Feeling ko lalo akong nakumpleto,” wika ni Dennis. “Ngayon, na-experience ko ’yong mga hindi ko na-experience dati. Nakapag-hands on ako talaga na mag-alaga ng pamilya, ng anak. Siguro isa ito sa pinakamasasayang stages ng buhay ko.”
[RELATED – Dennis Trillo sa pagiging ama: ‘Sobrang saya, lalo akong nakumpleto’]
Dahil dito, naging hamon daw talaga sa aktor ang malayo sa kanyang pamilya tuwing papasok sa lock-in taping.
“Medyo mahirap pero kailangan lang masanay. Kailangang magaling ’yong time management mo bilang artista at tatay sa bahay. ’Yon lang. Once na makuha mo na ’yong time management mo nang maayos madali ka nang makaka-adjust,” pagbabahagi niya.
Kaya naman labis ang pasasalamat ni Dennis sa kanyang katuwang na si Jennylyn.
“Gusto ko lang sabihin na napakasuwerte ng anak natin na ikaw ang Mama niya. Deserving ka talaga na magkaroon ng isang pang napakagandang anak na kamukha mo,” saad ng aktor sa Mother’s Day post niya para sa aktres. “Salamat sa lahat ng hirap at sakripisyo mo, alam kong hindi naging madali. Saludo ako sa’yo at sa lahat ng mga nanay na kagaya mo. Kaya nirerespeto, pinapahalagahan, at mahal na mahal kita.”